Petron, PLDT unahan sa panalo
MANILA, Philippines — Puntirya ng reigning champion Petron ang buwenamanong panalo sa pagharap nito sa PLDT ngayong hapon sa pagpapatuloy ng Philippine Superliga Grand Prix sa The Arena sa San Juan City.
Nakatakda ang pukpukan ng Blaze Spikers at Giga Hitters sa alas-2 habang susundan ito ng engkuwentro ng United Volley Club at Sta. Lucia Realty sa alas-4:15 at ng F2 Logistics at Cignal sa alas-7 ng gabi.
Tutok ang lahat kina American outside hitter Stephanie Niemer at power-hitting wing spiker Katherine Bell na siyang mangunguna sa kampanya ng Petron sa taong ito.
Nasa Blaze Spikers na rin si seasoned libero Denden Lazaro para mas lalo pang maging mabangis ang koponan ni Petron coach Shaq Delos Santos.
“We may have a strong team, but this Grand Prix is a wide open race,” ani Delos Santos na aasahan din sina local aces Mika Reyes, Aiza Maizo-Pontillas, Remy Palma, Bernadeth Pons at playmaker Rhea Dimaculangan.
Tiwala naman si PLDT mentor coach Gorayeb na makakasabay ang kanyang bataan sa pangunguna nina American reinforcements Grace Lazard at Kendra Dahlke.
Makakatuwang nina Lazard at Dahlke sina Jasmine Nabor, Aiko Urdas at Lou Ann Latigay.
Sa kabilang banda, ibabandera ng F2 Logistics si veteran reinforcement Lindsay Stalzer at Italian-American Becky Perry na makakatulong nina Aby Marano, Ara Galang, Kianna Dy, Dawn Macandili, Majoy Baron at Kim Fajardo.
- Latest