Gilas Pilipinas nagpanikad na

CEBU, Philippines — Nagpanikad na ang Gilas Pilipinas sa ilang duwa batok sa Qatar sa katapusang hugna sa FIBA World Cup qualifiers karong Huwebes didto sa Doha, Qatar.

Ang Gilas kinahanglan nga modaog sa katapusan nilang duwa sa qualifiers batok sa Qatar ug Kazakhstan sa Domingo aron makuha nila ang katapusang luna sa World Cup sa hinapos nga bahin ning tuiga didto sa China.

Gawas nga usa ka bulan ilang preparasyon alang sa final leg, wala  sa'y gihambin nga  injury ang mga sinaligan sa Gilas bisan pa og miduwa sila sa kasamtangang All-Filipino Cup sa PBA.

Sama sa ilang naturalized center nga si Andray Blatche nga gihulagway nga anaa sa kondisyon, ang mga PBA stars nga sila si JuneMar Fajardo, Jayson Castro, Marcio Lassiter ug Japeth Aguilar siyento porsiyento nga himsog.

Ang duha ka haligi sa Gilas nga sila si Fajardo ug Castro nindot usab og gipakita sa PBA diin mi-average sila og 19.1 points ug 18.7 points, matag usa.

Ang Gilas midaog sa una nilang sangka batok Qatar niadtong Septiyembre  nga gipahigayon dinhi sa Pilipinas, 92-81, apan hinay ang sugod sa mga Pinoy sa maong duwa sa wala pa sila mi-rally sa final period.