Davis nangluod, miiskor lang og tres puntos

CEBU, Philippines – Miani og mga negatibong reaksiyon ang pobreng performance ni All-Star Anthony Davis   sa New Orleans Pelicans nga gilubong sa mas huyang nga Orlando Magic, 88-118 sa NBA  kagahapon didto mismo sa ilang korte sa Smoothie King Center sa New Orleans, Louisiana.

Si Davis kinsa gihatagan og 24 minutos nga playing time,  miiskor lang og tres puntos ug daghan ang nagduda nga gituyo kini sa six-time All-Star tungod kay wala matuman ang gusto niini nga ma-trade ngadto sa laing koponan atol sa trade deadline niadtong  Biyernes. Dili katuohan nga moiskor lang og tres si Davis kay pirme kini mohimo og 'double-double' karon nga season. Sukad nahigtan siya sa Pelicans human mapupos ang trade deadline, si Davis mi-average na lang og otso puntos ug ang iyang tres puntos kagahapon maoy  labing ngil-ad niyang career performance.