Davao City kumpiyansa sa pagho-host ng Palaro
MANILA, Philippines — Optimistiko ang Davao City na magiging matagumpay ang kanilang pagdaraos ng 2019 Palarong Pambansa.
Ayon kay Davao City Sports Division Office head Michael Denton Aportadera, ilang pagsasaayos na lamang sa mga venues ang kanilang ginagawa sa kasalukuyan para sa pamamahala sa nasabing taunang sports event.
Gagamitin ng Davao City ang mga venues na kanilang pinagdausan ng nakaraang 2019 Davao Regional Athletic Association (DAVRAA).
Nakatakda ang 2019 Palarong Pambansa sa Abril 27 hanggang Mayo 4.
“Actually, nagamit na namin iyon for DAVRAA. Aesthetics na lang ang kulang and then some finishing touches. So were good,” wika ni Aportadera.
Maliban sa Davao City Sports Complex, idaraos din ang ilang sports events ng 2019 Palarong Pambansa sa mga privately owned sporting facilities kagaya ng University of Mindanao Sports Complex na may modernong rubberized track and field oval.
Ayon kay Aportadera, ang pangangasiwa sa nakaraang 2019 DAVRAA ay bilang paghahanda sa Palarong Pambansa.
Inihayag noong Abril ng 2018 ng Department of Education ang paghirang sa Davao City bilang host ng Palarong Pambansa.
- Latest