Davao muling dinomina ang BP Mindanao
TAGUM CITY, Davao del Norte- , Philippines — Sa loob ng dalawang buwan ay napanatili ng Davao City ang kanilang overall championship sa dalawang regional at qualifying events.
Matapos dominahin ang nakaraang 2019 Davao Regional Athletic Association (DAVRAA) ay matagumpay ding naidepensa ng Davao City ang korona sa 2019 Batang Pinoy Mindanao Leg na pormal na isinara kahapon dito sa Davao Del Norte Sports and Tourism Complex.
Humakot ang Davao City delegation ni Mayor Sara Duterte-Carpio ng kabuuang 56 gold, 39 silver at 58 bronze medals sa qualifying para sa 2019 Batang Pinoy National Finals sa Oktubre matapos kumolekta ng 170 golds, 125 silvers at 59 bronzes sa nakaraang 2019 DAVRAA meet noong Enero.
“Ang sikreto namin, binibigyan namin silang lahat ng chance to perform,” sabi ni Davao City Sports Division Office head Michael Denton Aportadera, sumalo sa dating trabaho ni Philippine Sports Commission chairman William ‘Butch’ Ramirez sa lungsod.
Noong 2018 Batang Pinoy Mindanao Leg sa Oroquieta City, Misamis Occidental ay nagposte ang Davao City athletes ng 54 ginto, 29 pilak at 25 tansong medalya para makamit ang overall title.
Nasa ilalim ng Davao City sa medal tally ng 2019 Mindanao Leg ang Cagayan De Oro (33-23-42), General Santos City (27-33-31), Davao Del Norte (24-25-24), Koronadal City (22-12-9), South Cotabato (20-24-20), Cotabato Province (19-13-9), Zamboanga City (15-20-28), Iligan City (14-21-29), Tacurong City (14-13-11), Tagum City (13-12-18) at Butuan City (11-13-20).
- Latest
