Wright, Abueva isinalba ang Phoenix
MANILA, Philippines — Nasa bingit na ng pagkalasap sa kanilang unang kabiguan ang Phoenix.
Ngunit hindi ito hinayaang mangyari nina Matthew Wright at Calvin Abueva nang itakas ang Fuel Masters laban sa NLEX Road Warriors, 83-82 sa 2019 PBA Philippine Cup kahapon sa MOA Arena sa Pasay City.
Iniskor ni Wright ang huling apat na puntos ng Phoenix sa fourth quarter para sa kanilang pang-limang sunod na ratsada at patuloy na solohin ang liderato ng torneo.
Napigilan naman ang hangad na ikatlong dikit na panalo ng NLEX para sa kanilang 2-4 baraha.
Tumapos si Wright na may 17 points, 6 assists, 5 rebounds at 2 steals para sa Fuel Masters, nagtayo ng 17-point lead sa first half bago iniwanan ng Road Warriors, 58-47 sa 8:06 minuto ng third period.
Ang three-point shot at dalawang free throws ni Wright kasama ang dalawang charities ni big man Justin Chua ang nagbigay sa Phoenix ng 83-77 bentahe sa 2:45 minuto ng fourth quarter.
Isang Euro step ni Bong Galanza at triple ni Philip Paniamogan ang nagdikit sa NLEX sa 82-83 sa nalalabing 56.4 segundo.
Kapwa nagmintis sa kanilang posesyon ang Fuel Masters at Road Warriors bago sinupalpal ni Abueva ang tangkang tres ni Galanza sa pagtunog ng final buzzer.
Samantala, sasagupain ng Barangay Ginebra ang Blackwater ngayong alas-5 ng hapon sa Digos City, Davao del Sur Coliseum.
Nagmula ang Gin Kings, may 2-2 baraha, sa 97-85 paggupo sa Columbian Dyip (2-4) noong nakaraang Sabado sa Ynares Center sa Antipolo City.
- Latest