Phoenix inakay ni Calvin Abueva sa ika-4 na dikit

MANILA, Philippines — Halos walang nakitang kamalian si coach Louie Alas sa kanyang mga Fuel Masters.

Dumiretso ang Phoenix sa kanilang ikaapat na sunod  na arangkada matapos durugin ang Blackwater, 114-95 para patuloy na pamunuan ang 2019 PBA Philippine Cup kahapon sa Ynares Center sa Antipolo City.

Humakot si Calvin Abueva ng 22 points, 14 rebounds, 2 steals at 2 assists para sa Fuel Masters.

“I just do my best sa mga ipinapagawa ni coach (Alas),” sabi ng 6-foot-2 na si Abueva. “Sa mga teammates ko, binibigyan naman nila ako ng confidence para sa mga games na maaaring maging iba ang sitwasyon.”

Kaagad naging agresibo ang Phoenix sa first period kung saan nila itinayo ang 24-point lead, 35-11 mula sa dunk ni Abueva sa huling 1:10 minuto nito.

Lalo pang nabaon ang Blackwater, nalasap ang ikatlong kabiguan sa apat na laro, sa kaagahan ng third quarter, 46-77  mula sa basket ni Perkins, ang 2018 Rookie of the Year.

Ang dalawang magkasunod na three-point shots nina Perkins at Wright ang nagpalobo sa kalamangan ng Fuel Masters sa 85-48 sa huling 4:31 minuto ng third period.

Isinalpak ni Abueva ang isang three-point play habang umiskor si Perkins para ibigay sa Phoenix ang 106-87 bentahe sa huling 1:47 minuto ng final canto na hindi na napababa ng Blackwater.