Luna sa finals tirada sa Talisay ug Carcar
CEBU, Philippines – Luna sa finals maoy gilaraw sa Talisay City Aquastars ug Carcar City sa ilang pakigsangka batok sa managlahing kontra sa crossover semifinals sa Samsam Gullas Cup 3.0 Cebu 1st District Legacy Cup Inter-Cities and Municipalities Basketball Tournament karong gabii diha sa Talisay City Sports Complex.
Sa pasiunang duwa sa alas-6 sa gabii, ang second-ranked Carcar makigharong sa No. 3 qualifier Minglanilla Archangels, samtang ang the topseeded Aqustarts makigsangka sa fourth-ranked San Fernando Spartans sa main game sa alas-8 sa gabii.
Ang host Talisay adunay 'twice-to-beat' advantage gumikan sa pagdominar niini sa eliminasyon bitbit ang 5-0 record. Ang Carcar maoy ikaduha dala ang 4-1 nga baraha ug gisundan kini sa Minglanilla (3-2) ug San Fernando (2-3).
Ang mga mananaog magtigi dayon sa 'best-of-three' finals series sugod karong Pebrero 5. Ang Game 2 gikatakda karong Pebrero 9, samtang ang Game 3, kun gikinahanglan, duwaon karong Pebrero 10. Gawas sa tropeyo, ang makampiyon mobulsa og P80,000 samtang ang mopahiluna sa ikaduha ngadto sa ikaupat nga dapit modawat og P60,000, P40,000 ug P20,000.
- Latest
