Knicks mi-trade ni porzingis ngadto sa Dallas Mavericks

CEBU, Philippines – Si Kristaps Porzingis nga wala makaduwa sud sa dul-an usa ka tuig gumikan sa injury, gilabog sa New York Knicks ngadto sa Dallas Mavericks sa usa ka multi-player NBA trade kagahapon.

Gibuhian sab sa Knicks silang Trey Burke, Courtney Lee ug Tim Hardaway ngadto sa Mavs puli nilang Wesley Matthews, Dennis Smith DeAndre Jordan ug duha ka first round draft picks.

Matud pa sa Knicks nga si Porzingis mismo ang mihangyo kanila nga magpa-trade.

"Considering the uncertainty regarding Kristaps' free agent status and his request today to be traded, we made a trade that we are confident improves the franchise," matud pa ni Knicks general manager Scott Perry.

Ang Knicks  kasamtangan nagkupot og 10-40 record nga maoy labing bati sa NBA karon nga season.

Kun ugaling makabalik na og duwa si Porzingis,  makalisang na unya ang frontcourt sa Mavs diin iyang ikatumpang ang mangtas nga si Luka Doncic.

Si Porzingis maoy No. 4 overall pick sa Knicks niadtong 2015 NBA draft. Mi-average siya og career-high 22.7 puntos matag duwa sa wala pa mayayay ang wala niyang tuhod niadtong 2017-2018 season.

Samtang ang 29-anyos nga si Hardaway maoy topscorer sa Knicks karong season uban ang average nga 19.1 points matag duwa.