Davis multa'g $50t sa NBA

CEBU, Philippines — Si Anthony Davis gipamulta og $50,000 (P2.5 million) sa NBA gumikan sa pag-publikar niini sa iyang tinguha nga magpa-trade gikan sa New Orleans Pelicans.

Sa miaging adlaw, ang five-time All-Star ug 2012 London Olympics gold medalist mipahibalo sa Pelicans nga dili na siya interesado nga lugwayan pa ang iyang kontrata ug gusto niyang magpabalhin ngadto sa laing team nga usa ka NBA contender sa dili pa ang trade deadline karong Pebrero 8.

Ang tinguha ni Davis nga  gipaagi   sa  iyang ahente nga si Rich Paul, usa ka kalapasan sa lagda sa NBA hinungdan nga gipahamtangan siya og silot.

Mismo ang Pelicans hinuon ang mipadayag nga si Davis gusto nang mobiya sa ilang koponan. Apan giklaro sa Pelicans nga ilang hatagan og prayoridad ang kaayohan sa ilang team ug buhaton nila ang tanan sa kaugalingon nilang termino ug sa panahon nga ilang gusto.

Ang 25-anyos nga si Davis, ang No. 1 overall pick sa  2012 NBA Draft, dunay average nga 29.3 points, 13.3 rebounds, 4.4 assists, 2.6 blocks ug 1.7 steals matag duwa karon nga season uban sa Pelicans.

Sa pagka karon, duha ka teams ang interesado nga mokuha sa serbisyo ni Davis ug kini mao ang Boston Celtics ug LA Lakers.