Harden tumibag ng 61-pts. vs Knicks
NEW YORK — Nagbagsak si James Harden ng career-high 61 points at pinantayan ang record ni Kobe Bryant para sa isang bisitang koponan sa Madison Square Garden sa 114-110 panalo ng Houston Rockets laban sa Knicks.
Isinalpak ni Harden ang clinching layup sa huling 3.8 segundo para sa Houston matapos ang turnover ng New York at itinala ang pang-lima niyang 50-point game ngayong season.
Kumonekta si Eric Gordon ng go-ahead 3-pointer sa nalalabing 9.8 segundo nang mabigo ang Rockets na maibigay ang bola kay Harden, ang NBA leading scorer na inungusan si Wilt Chamberlain sa fourth place sa NBA history sa kanyang ika-21 sunod na 30-point game.
Sa Detroit, humugot si Blake Griffin ng 20 sa kanyang game-high 37 points sa first quarter habang hinablot ni Reggie Bullock ang isang loose ball para sa kanyang slam dunk sa huling 14.5 segundo sa 98-94 paggupo ng Pistons kontra sa New Orleans Pelicans.
Nagdagdag si Reggie Jackson ng 17 points para sa Detroit, nalampasan ang pagbangon ng New Orleans para tapusin ang kanilang two-game losing skid.
Sa New York, nagposte si guard D'Angelo Russell ng double-double mula sa kanyang 25 points at 10 rebounds habang tumipa si Spencer Dinwiddie ng 29 points para ilusot ang Brooklyn Nets laban sa Orlando Magic, 114-110.
- Latest