'Melo' Anthony gidiskarga sa Rockets ngadto sa Bulls
CEBU, Philippines – Miuyon ang Houston Rockets nga idiskarga si Carmelo Anthony ngadto sa Chicago Bulls aron mahawanan ang ilang luxury tax bill.
Gitaho sa Chicago Tribune nga ang Bulls makadawat lamang og $1 million alang ni Anthony.
Apan si Anthony dili makaduwa sa Bulls gumikan kay ila man sab dayon kining buhian sa dili pa ang trade deadline karong Pebrero 7.
Gumikan niini, nagkaduol na ang posibilidad nga si Anthony malandig sa Los Angeles Lakers nga maoy iyang gihandum.
Niadtong Nobiyembre sa miaging tuig, gikopirmar sa Rockets nga si Anthony dili na kabahin sa ilang plano human kini makaduwa og 10 lamang ka duwa uban kanila.
Ning kalamboan, daw sa mahulog nga naglibod suroy na si Anthony sa NBA.
Si Anthony maoy No. 3 overall pick sa Denver Nuggets niadtong 2003 NBA Draft. Mibalhin siya sa New York Knicks niadtong 2011 human sa huwaw niyang season uban sa Oklahoma City Thunder.
Sa miaging tuig, mipirma siya sa Rockets isip usa ka free agent.
Ang 34-anyos nga si Anthony usa sa 11 lamang ka players sa kasaysayan sa NBA nga dunay average nga 24.0 points, 6.0 rebounds ug 3.0 assists matag duwa. Usa sab siya ka three-time Olympic gold medalist.
- Latest