Broner naniniwalang natalo si Pacman

MANILA, Philippines — Hindi naniniwala si Adrien Broner na tinalo siya ni "Pambansang Kamao" Manny Pacquiao sa kanilang laban noong Linggo (Sabado sa Las Vegas, Nevada).

Pagpupumilit ni Broner, wagi siya sa 12-rounds ng bakbakan nila ng fighting senator.

"I beat him. Everybody out there knows I beat him. I controlled the fight, he was missing. I hit him clean more times. I beat him (Natalo ko siya. Alam ng lahat nang nandoon na natalo ko siya. Kontrolado ko ang laban, hindi siya makatama. Tinamaan ko siya nang mas maraming beses. Natalo ko siya)," sabi ng 29-anyos na higit na nakababata kay Pacman matapos matalo sa pamamagitan ng unanimous decision sa MGM Grand Garden Arena.

Napanatili ng 40-anyos ang paghawak sa WBA welterweight belt.

Pinaulanan ng ilang kombinasyon ni Manny si Adrien, dahilan para mahirapan si Broner sa ika-pito at ika-siyam na round.

Pinasinungalingan naman ng mga numero ang kanyang salaysay.

Kung sisilipin ang scorecards, makikita kung paano nanaig si Pacman laban kay Broner sa pananaw ng lahat ng judges (117-111, 116-112, 116-112).

Naniniwala rin ang boksingero mula Cincinatti na "niluto" ang laban para matuloy ang muling paghaharap nina Pacquiao at undefeated American boxer na si Floyd Mayweather Jr. 

Namataan si Mayweather sa ringside kung saan pinanuod niya ang laban.

“You know I beat that boy. They are trying to get that money with Pacquiao and Floyd (Alam niyong natalo ko 'yan. Gusto lang nilang kumita kina Pacquiao at Floyd),” ani Broner.

"I beat him. Smart boxing (Natalo ko siya. Smart boxing)," dagdag niya.