Cousins milabok dayon unang duwa sa Warriors

CEBU, Philippines —  Na-fouled out man tuod siya sa labing una niyang duwa sa Golden State Warriors, apan  si DeMarcus Cousins mipakita sa iyang dakong matampo sa koponan nga laraw mosakmit og grandslam title karon nga season.

Ang 6-foot-11 nga si Cousins mirehistro og 14 puntos bisan pa sa limitado nga oras aron tabangan ang Warriors paglubong sa Los Angeles Clippers, 112-94, kagahapon didto sa Staples Center sa Los Angeles, California.

Si Cousins nga milangkat sab og unom ka rebounds ug tulo ka assists, mao pa'g pagbalik og duwa human sa usa ka tuig nga pagpahuway tungod sa injury. 

Ang Warriors mihimo og gamay'ng kasaysayan  tungod kay sila ang unang koponan sa 42 ka tuig sa NBA nga miparada og lima ka All-Stars isip starting line-up.

Si Stephen Curry maoy nangu  sa Warriors sa iyang 28 puntos, samtang si Kevin Durant adunay 24 puntos.

Sa laing duwa, gisakmit ni legendary coach Gregg Popovich ang ika-520 niya nga road win uban sa San Antonio Spurs human nila gipukan ang Minnesota Timberwolves, 116-113  didto sa  Target Center sa Minnesota.

Nangulo sa Spurs si LaMarcus Aldridge nga adunay 25 puntos, samtang ang veteran nga si Rudy Gay mitampo og 22 puntos.

Sa uban pang mga resulta, ang Brooklyn Nets nakaipsot sa Orlando Magic, 117-115, ang Boston Celtics mipilde sa Memphis Grizzlies, 122-116, ang Portland Trail Blazers milubong sa New Orleans Pelicans, 128-112, samtang gilubong sab sa Utah Jazz ang Cleveland Cavaliers, 115-99.