Harden miburak 57 puntos

CEBU, Philippines — Mipabuhagay og 57 puntos si James Harden aron mangulo sa undermanned nga Houston Rockets nga midaog  batok sa Memphis Grizzlies,  112-94 sa duwa nila sa NBA kagahapon didto sa Toyota Center sa Houston, Texas.

Ang reigning MVP miinat sa iyang ratsada ngadto sa 17 ka duwa diin siya miiskor og dili momenos 30 puntos. Mitugpo siya og 36 puntos sa nag-unang duha ka kuwarter pa lamang aron mosulbong ang Rockets.

Mao kini ang ikaduhang labing taas nga ratsada sukad si Wilt Chamberlain miiskor og dili momenos 30 puntos sud sa 20 ka sagunson nga duwa niadtong 1964.

Mikulit sab si Harden og franchise-record sa ika-14 niining higayon nga mitali og dili momenos 40 puntos ug ikawalong higayon sa miagi niyang 11 ka duwa. Ikatulo sab kining higayon nga milapas siya og 50 puntos karon nga season ug ika-12 sa kinatibuk-an sa iyang karera.

Tayming kaayo ang pagbuto ni Harden gumikan kay pulos man injured ang tulo nila ka sinaligan nga sila si Clint Capela, Chris Paul ug Eric Gordon.

  Sila si Garrett Temple ug Mike Conley mipupo og 14 puntos matag usa alang sa Grizzlies nga napukan kawalo sa miagi nilang siyam ka duwa.

Sa laing aksiyon, si D'Angelo Russell miwadwad og 18 sa iyang 34 puntos sa ikatulong kuwarter sa dihang gibitik sa Brooklyn Nets ang Boston, 109-102  aron putlon ang 10 ka sunod-sunod nilang pilde batok sa Celtics.

Si Jarrett Allen midugang og 19 puntos ug 12 ka rebounds sa Nets nga midaog kasiyam sa katapusan nilang 10 ka duwa didto sa ilang korte

Si Jayson Tatum dunay 34 puntos ug si Jaylen Brown mihipos og 22 puntos sa Celtics nga miduwa nga wala sila si Kyrie Irving ug Marcus Smart tungod sa injury.