Talisay, Minglanilla 3-0 na sa Gullas Legacy Cup

CEBU, Philippines — Giharos og daog sa Talisay City Aquastars ang duha nila ka duwa niadtong weekend, samtang pabilin nga nanginit ang Minglanilla Archangels hinungdan nga ilang gisaw-an karon ang liderato sa Samsam Gullas Cup 3.0 Cebu 1st District Legacy Cup Inter-Cities and Municipalities Basketball Tournament bitbit ang managsamang 3-0 records.

Niadtong Sabado didto sa Enan Chiong Activity Center sa Dakbayan sa Naga, ang Aquastars mibugwak og kayo gikan sa pagsugod sa duwa dayon na ngadto sa 87-72 nga demolisyon sa San Fernando Spartans.

Wala na mahulga pa ang Aquastars sukad gisirad-an ang first half uban ang 42-26 nga labaw.

Si Jhaylord Castro dunay 19 puntos ug si Keaton Clye Taburnal miiskor og 17 puntos alang sa Talisay, apan si Jay Deiparine maoy gibayaw nga 'best player of the game' human mikolekta og 15 puntos, walo ka steals ug pito ka assists.

Sa sunod nga adlaw didto sa Bonifacio Bacaltos Sports Centrum sa Sibonga, padayon nga nagmangtas si Deiparine uban ang 23 puntos, upat ka rebounds, tulo ka steals ug duha ka assists sa dihang gipakaging sa Aquastars ang Sibonga Pillars, 75-64.

Miamot si Tabural og 19 puntos, samtang si Raffy Bacasmas miksmada og 16 puntos, pito ka rebounds ug upat ka steals sa Aquastars nga kontrolado kaayo ang duwa sukad miposte og 37-21 nga labaw atol sa halftime.

Wala sab magpabitin ang Minglanilla nga misutoy ngadto sa ikatulo nilang sagunson nga daog pinaagi sa paglampaso sa Naga City Electrifiers, 76-55.

Si Patrick John Dobleros mitagak og 20 puntos, upat ka steals, tulo ka rebounds ug tulo ka assists sa Archangels  nga milusad og  24-9 rally sa ikaduhang kuwarter aron paglubong sa Electrifiers og 21 puntos human sa first half, 42-21.

Sa uban pang mga duwa, si Leonilo Martorillas maoy milugwa nga bida sa duha ka sagunson nga daog sa Carcar City.

Si Martorillas mihipos og 24 puntos ug unom ka rebounds sa dihang gibuntog sa Carcar ang Naga, 80-73, ug dayon mipupo og 23 puntos, pito ka rebounds, tulo ka assists ug tulo ka steals sa dihang ilang gitiwasan ang kalbaryo sa wala pa'y daog nga defending champion San Fernando Spartans, 74-55. (BANAT NEWS)