Curry miposa og 11 ka tres

CEBU, Philippines — Nanginit og maayo si Stephen Curry diin miposa kini og 11 ka tres sa iyang 48 puntos sa dihang ang Golden State Warriors mipakaging sa Dallas Mavericks, 119-114 alang sa ikaupat nilang sagunson nga daog sa NBA kagahapon  didto sa American Airlines Center sa Dallas, Texas.

Si Curry mikadlit og 24 puntos sa second half, apil na ang katapusang siyete puntos nga maoy mituldok sa kadaogan sa Warriors.

"We didn't panic. We took our time on offense and didn't have turnovers," matud pa ni Curry human sa ilang pagkawat og daog sa duwa diin ang Mavs dumadaog kay naglabaw og singko puntos, 113-108 sa nahibilin nga kuwatro minutos sa aksiyon.

Dako sab og natabang si Kevin Durant nga mihipos og 28 puntos, samtang si Klay Thompson nakamaneho og 16 puntos bisan nasipyat og siyam sa 11 niini ka 3-pointers.

Si Luka Doncic, ang kandidato pagka-Rookie of the Year, maoy nangu sa Mavs uban ang 26 puntos, lima ka assists ug unom ka rebounds. Si Harrison Barnes mi-iskor og 22 sa pilderong kawsa.

Sa laing duwa, si Serge Ibaka milansang og krusyal nga tres sa nahibiling 15 segundos sa ikaduhang overtime aron aswaton ang Toronto Raptors ngadto sa 140-138 nga kadaogan batok sa Washington Wizards.

Si Kawhi Leonard mibugha og 41 puntos alang sa Raptors nga maoy nagkupot sa labing nindot nga  record sa NBA karon nga season  nga adunay 33-12.

Didto sa New York, si Joel Embiid mitali og 26 sa dihang gipiog sa Philadelphia 76ers ang Knicks, 108-105, samtang didto sa Orlando, sila si Nikola Vucevic ug Aaron Gordon mipupo og 22 puntos matag usa sa dihang ang Magic nakasugakod sa 38 puntos ni James Harden aron pakgangon ang Houston Rockets, 116-109

Wala sab magpa-alkansi sila si Cedi Osman ug Collin Sexton nga nagkumboya og 37 puntos sa dihang giputol sa Cleveland Cavaliers ang 12 ka sagunson nilang pilde pinaagi sa pagpayaka sa nagkagidlay nga L.A. Lakers, 101-95. (BANAT NEWS)