Thunder mibawos sa Spurs

CEBU, Philippines — Si Russell Westbrook mikadlit og 24 puntos ug 10 ka rebounds ug si Dennis Schroder mibubo sa tanan niyang 10 puntos sa second half sa dihang ang Oklahoma City Thunder mibawos og tuhak sa San Antonio Spurs, 122-112 sa NBA kagahapon didto sa Chesapeake Energy Arena sa Oklahoma City.

Ang Thunder madasigon nga mi-rally human mabiyai og nuybe puntos sa halftime ug mikontrolar sa duwa sa ikatulong kuwarter dayon na ngadto sa pagpanimawos sa 154-147 nilang kaparotan batok sa Spurs sud sa duha ka overtime duha ka gabii pa ang milabay.

Si Paul George miamot og 18 puntos ug 11 ka rebounds sa Oklahoma City nga milampaso sa Spurs, 35-20 sa ikatulong kuwarter.

Ang daog nakaputol sa tulo ka sagunson nga pilde sa Thunder, samtang ang Spurs kaduha pa lamang mapilde sa miagi nilang walo ka duwa.

Si Marco Belinelli mi-iskor og 24 ug si DeMar DeRozan miamot og 18 puntos sa pilderong Spurs.

Si LaMarcus Aldridge nga mipabuhagay og career-high 56 puntos batok sa Thunder niadtong Biyernes, naangklahan ning higayona ngadto lamang sa 17 puntos.

"They didn't let me play," matud pa ni Aldridge diin ang gipasabot ang hugot nga depensa sa Thunder ngadto kaniya."They doubled me in every way. They came from the baseline, from the top. They made sure that the ball wasn't in my hands."

Sa laing duwa, si Blake Griffin mipatuasik og 44 puntos sa dihang gipukan sa Detoit Pistons ang kanhi niya team nga Los Angeles Clippers sa iskor nga 109-104.

Emosyonal kaayo ang maong adlaw ni Griffin nga giisnab ang tag-iya sa Clippers nga si Steve Ballmer sa wala pa ang duwa ug gikalalis ang kanhi niya teammate nga si Patrick Beverley pagkahuman sa aksiyon.

"There was a lot of hype coming into this game and I was looking forward to it, but I'm glad that it's over," sumala pa ni Griffin. "The next time I come it won't be as crazy."

Dili maayo ang buot ni Griffin sa Clippers gumikan sa makapakurat niining pag-trade kaniya ngadto sa Detroit niadtong Enero human siya gipapirma niini og lima ka tuig nga kontrata nga mibalor og $171 million. (BANAT NEWS)