Makati, Quezon City wagi sa MPBL
MANILA, Philippines — Nagsanib-puwersa sina Mark Isip at John Rey Villanueva sa kanilang tinapos na 30 points para ihatid ang Makati Super Crunch sa 76-71 panalo kontra sa Pasig Pirates, habang nagwagi ang Quezon City Capitals laban sa Mandaluyong El Tigre, 86-76, sa 2019 Maharlika Pilipinas Basketball League (MPBL) Datu Cup noong Martes ng gabi sa Pasig City Sports Center.
Umani si Isip ng 19 points, 6 rebounds at 2 assists at si Villanueva ay nagdagdag ng 11 points, 9 rebounds, 2 assists at 1 steal para makopo ng Makati ang ika-siyam na sunod panalo at sumosyo sa ikatlong puwesto kasama ang San Juan Knights sa pareho nilang 15-4 kartada sa Northern Division.
Bukod kina Isip at Villanueva, tumulong din ng 12 points si Joseph Sedurifa, habang si Jeckster Apinan ay nagtala ng 11 markers para sa Super Crunch.
Ang Pasig Pirates ni coach James Anton Machate ay nanatili sa ilalim ng standing sa Northern Division sa 3-15 baraha.
Sa iba pang laro, nasungkit ng Quezon City Capitals ang pang-pitong panalo sa 16 laro bunga ng kanilang protesta ukol sa paggamit ng El Tigre kay Ronjay Buenafe na hindi eligible maglaro sa MPBL.
Ang El Tigre ay bumaba sa 7-11 record sa Northen group na pinangunahan ng Bataan Risers (16-2) at Manila Stars (16-3) kasunod ang San Juan Knights (15-4) at Makati Super Crunch (15-4).
- Latest