Paghahanda sa 2019 SEAG sa TOPS

MANILA, Philippines — Isisiwalat ni Team Phi­lippines Chief of Mission Monsour del Rosario ang ginagawang paghahanda para sa 30th Southeast Asian Games na gaganapin dito sa bansa simula Nobyembre 30 hanggang Disyembre 11 sa taong ito.

Si Makati Rep. Del Rosario ang main guest of honor sa TOPS (Usapang Sports) bukas sa National Press Club sa Maynila.

Kasama ni Philippine Taekwondo Association (PTA) secretary-general Del Rosario sina SEA Games Organizing Committee executive-director Tom Carrasco at mga da­ting swimming champions Eric Buhain at Ral Rosario.

Ang tinaguriang “Mr. Taekwondo” na si Del Rosario ay naging champion din sa SEAG, Asian Games at World Taekwondo Cham­pionships simula noong 1982 hanggang 1989.

Nag-uwi si Del Rosario ng gold sa 14th SEAG sa Jakarta, Indonesia noong 1987 at 15th SEAG sa Kuala Lumpur, Malaysia noong 1989 at bronze medalist sa world cham­pionship noong 1985 at 1986 sa Seoul, South Korea.

Si Buhain na isa ring dating chairman ng Philippine Sports Commission, ay humakot ng anim na gintong medalya sa swimming sa SEA Games na ginanap sa Maynila noong 1991. Ang dating two-time Olympian na si Buhain ay naging chairman din ng Games and Amusement Board noong 2005.

Ang pamosong si Ral Rosario naman ay isang PSC Hall of Fame awardee noong 2016 at gold meda­list sa 1978 Bangkok Asian Games at kumatawan sa bansa sa 1972 Munich Olympiad at sa 1976 Montreal Olympics Games.