Pacquiao rumbuhon ang lawas ni Broner

CEBU, Philippines – Ang American trainer ni Manny Pacquiao nga si Freddie Roach miangkon nga dili sayon tumbahon si kanhi junior welterweight champion Adrien Broner.

Niadtong miaging adlaw, si Pacquiao miingon nga knockout nga kadaogan ang tuyo niya sa iyang WBA welterweight title defense batok ni Broner karong Enero 19 didto sa MGM Grand Garden Arena sa Las Vegas.

Si Roach suporta sa laraw ni Pacquiao, apan kinahanglan nga dili magdali ang Pinoy champion aron  segurado matuman niini iyang gusto nga mapatumba si Broner.

Ang Hall-of-Famer trainer nagkanayon nga lig-on si Broner, apan namatikdan niya nga dali ra kini madutlan sa lawas ug mao kini iyang gisugyot ni Pacquiao.

Si Pacquiao padayon karon sa iyang subsob nga ensayo uban ni Roach sa Wild Card Gym sa Los Angeles California.