Blatche balik Gilas
MANILA, Philippines — Magbabalik-aksiyon si naturalized player Andray Blatche para sa Gilas Pilipinas na sasalang sa 2019 FIBA World Cup Asian qualifiers sa Pebrero 21.
Kinumpirma ito ni Samahang Basketbol ng Pilipinas president Al Panlilio kung saan nais ni Blatche na dumating ng maaga sa Pilipinas upang makaagapay sa sistema ni Gilas head coach Yeng Guiao.
Mismong si Blatche na rin ang nagkumpirma na muli itong masisilayan suot ang national team jersey.
Hindi kasama si Blatche sa lineup ng Gilas Pilipinas na naglaro laban sa Kazakhstan at Iran.
Sina Christian Standhardinger at Stanley Pringle ang nagsilbing naturalized players sa naturang mga laro ngunit natalo ang Pinoy squad.
Kaya naman lumakas ang panawagan na ibalik si Blatche sa lineup.
Huling naglaro si Blatche noong Hulyo 2 nang mapaaway ang Gilas Pilipinas laban sa Australia sa Philippine Arena.
Napatawan ito ng tatlong larong suspensiyon ng FIBA kasama ang siyam pang Pinoy players.
Sa pagbabalik ni Blatche sa lineup, umaasa ang SBP na mapapalakas nito ang Gilas Pilipinas para buhayin ang pag-asang makahirit ng tiket sa FIBA World Cup.
Makakalaban ng Pilipinas sa Pebrero 21 ang Qatar at Pebrero 24 ang Kazakhstan.
- Latest
