La Salle nagtatayo uli ng dinastiya sa UAAP

Collegiate volleyball: Arellano dominado ang NCAA

MANILA, Philippines — Muling bumubuo ng dinastiya ang De La Salle University na nakumpleto ang matikas na three-peat sa UAAP Season 80 wo­men’s volleyball tournament.

Mabangis ang Lady Spikers na nagmamay-ari ng 11 korona para ma­panatili ang estado nito bilang isa sa pinakamatitikas na collegiate team sa bansa.

At muli itong nasilayan nang patumbahin ng La Salle ang Far Eastern University (2-0) sa best-of-three finals.

Nanaig ang Lady Spi­kers sa Game 1 sa iskor na 29-27 25-21, 25-22 gayundin sa Game 2 sa pamamagitan naman ng 26-24, 25-20, 26-24 na parehong nilaro sa Smart Araneta Coliseum.

Itinanghal na Finals MVP si libero Dawn Macandili bilang magandang pabaon sa kanyang huling taon sa La Salle.

Maganda rin ang exit ni Jaja Santiago na siya namang nakakuha ng Season MVP plum at ng Best Attacker award.

Kasama rin sa mga awardees sina University of Santo Tomas players Milena Alessandrini (Rookie of the Year) at Sisi Rondina (Best Scorer); Celine Domingo ng FEU (Best Blocker), Desiree Cheng ng La Salle (Best Server), Kathleen Arado ng University of the East (Best Receiver at Best Digger) at Deanna Wong ng Ateneo de Manila University (Best Setter).

Sa men’s division, nabawi ng National University ang kampeonato nang tanggalan nito ng korona ang Ateneo (2-0) sa kanilang sariling best-of-three series.

Naitarak ng Bulldogs ang 25-20, 25-19, 25-23 panalo sa Game 1 at 25-20, 31-29, 22-25, 33-31 pananaig sa Game 2.

Apat na individual awards ang nakuha ni Marck Jesus Espejo ng Ateneo - ang Season MVP, Best Scorer, Best Attacker at Best Server - habang Finals MVP si Bryan Bagunas ng NU.

Rookie of the Year naman si Ariel Morado Jr. ng Ateneo habang Best B­locker si Jayvee Su­ma­gaysay ng UST, Best Digger si Jopet Movido ng La Salle, Best Setter si Ish Polvorosa ng Ateneo at Best Receiver si Rikko Marius Mamerto ng FEU.

Sa NCAA Season 93, wagi ang Arellano University laban sa San Beda University, 2-0 para pagreynahan ang women’s division.

Nalusutan ng Lady Chiefs ang Lady Red Spi­kers sa Game 1, 25-15, 25-16, 15-25, 22-25, 15-6  bago tuluyang pinataob ang San Beda sa Game 2, 25-13, 29-27, 25-15.

Finals MVP sa serye si Regine Arocha ng Arellano na siya ring Best Opposite Spiker habang nakakuha rin ng awards ang katropa nitong sina Necole Ebuen (Rookie of the Year) at Jovielyn Prado (Best Outside Spiker).

Wagi rin sina San Sebastian College-Recoletos players Joyce Sta. Rita (Best Middle Blocker), Vira Guillema (Best Setter) at Alyssa Eroa (Best Libero) gayundin sina Lourdes Clemente ng University of Perpetual Help System Dalta (Best Middle Blocker) at sina Jose Rizal University bets Shola Alvarez (Season MVP) at Dolly Verzosa (Best Outside Hitter).

Sa men’s division, dumaan muna sa butas ng karayom ang Perpetual Help bago kubrahin ang korona laban sa Arellano.

Umabot sa rubber match ang serye kung saan nagwagi ang Arellano sa Game 1 (12-25, 25-21, 19-25, 26-24, 15-9) ngunit naitabla ito ng Perpetual Help sa bisa ng 26-24, 25-20, 23-25, 25-16 panalo sa Game 2.

Sa Game 3, kinatigan ng suwerte ang Altas matapos iselyo ang 25-23, 25-27, 25-19, 25-23 desisyon para masungkit ang kampeonato.

Nasikwat ni Joebert Almodiel ng Altas ang Season MVP at Rookie of the Year awards habang Finals MVP si Perpetual Help team captain Rey Taneo Jr.