Biado huling Pinoy na kumakasa

MANILA, Philippines — Bukod-tanging si reigning champion Carlo Biado na lamang ang kumakasang Pinoy sa 2018 World 9-Ball Championship na ginaganap sa Al-Attiya Sports Arena sa Al-Arabi Sports Club sa Doha, Qatar.

Naglista si Biado ng 11-7 desisyon kontra kay Konrad Juszczyszyn ng Poland sa first round kasunod ang 11-9 panalo kay Vitaliy Patsura ng Ukraine sa second round para umabante sa Last 16.

Puntirya ni Biado na masungkit ang puwesto sa quarterfinals sa pakikipagtipan nito kay dating world champion Wu Jiaqing ng China na namayani kina Japanese bets Tomoya Iima sa first round (11-4) at Toru Kuribayashi sa second round (11-6).

Lalarga rin ang salpukan nina Robbie Capito ng Hong Kong at Joshua Filler ng Germany, Albin Ouschan ng Austria at Wiktor Zielinski ng Poland, Niels Feijen ng Netherlands at Alexandros Kazakis ng Greece, Corey Duel ng Amerika at Ko Pin Yi ng Chinese-Taipei, Petri Makkonen ng Finland at Lin Wu Kun ng Chinese-Taipei, Chris Melling ng Great Britain at Shane Van Boening ng Amerika at nina Chinese-Taipei cue masters Lin Ta Li at Jung Lin Chang.

Si Biado na lamang ang nag-iisang Pilipino sa torneo matapos yumuko sina Ronald Garcia, Johann Gonzales Chua, Jeffrey Ignacio at Jeffrey De Luna.