3 Pinoy swak sa knockout stage

MANILA, Philippines — Nakahirit din ng tiket sa knockout stage ang tatlong Pinoy sa pagpapatuloy ng 2018 World 9-Ball Championship na ginaganap sa Al-Attiya Sports Arena sa Al-Arabi Sports Club sa Do­ha, Qatar.

Ito ay sina Roland Gar­cia, Johann Gonzales Chua at Jeffrey Ignacio na nagtala ng krusyal na pa­nalo sa kani-kaniyang gru­po sa losers’ bracket sa torneong inorganisa ng World Pool-Billiard Asso­ciation.

Iginupo ni Garcia si Bil­ly Thorpe ng Amerika sa is­kor na 9-5 sa Group 3, habang namayani si Chua kay Jeong Young Hwa ng South Korea (9-3) sa Group 4.

Umiskor din si Ignacio ng 9-6 panalo kay Satoshi Ka­wabata ng Japan sa Group 6 para saluhan sina Garcia at Chua sa susunod na yugto.

Makakasama nina Gar­cia, Chua at Ignacio sa knockout stage sina reig­­ning champion Carlo Bia­­do at Jeffrey De Luna na nauna nang nakapasok ma­tapos magtala ng 2-0 mar­ka sa kani-kanilang gru­­po.

Magsisimula ang main draw Lunes ng gabi (oras sa Maynila).

Sa first round, makakalaban ni Garcia si Waleed Majid ng Qatar, habang ha­harapin ni Chua si Phone Myint Kyaw ng Myanmar, at titipanin ni Ignacio si Petri Makkonen ng Finland.