Sharks mipaksit sa Voyagers
CEBU, Philippines — Nabungog sa sinugdanan ang Cebu City Sharks, apan nakarekober sa dayong human sa first period aron pagpatikalbong sa Pasay City Voyagers, 76-61 sa 2018 Maharlika Pilipinas Basketball League (MPBL) Datu Cup niadtong Huwebes didto sa STRIKE Gymnasium sa Bacoor, Cavite.
Si Rhaffy Octobre mirehistro og 'double-double' sa iyang 17 puntos ug 13 ka rebounds alang sa Sharks nga nagtangag na karon og 7-11 record. Miamot si Patrick Cabahug og 12 puntos ug pito ka rebounds, samtang si Fil-Australian William McAloney miiskor og nuybe uban ang 12 ka rebounds sa Sharks nga tulin na kaayo ang paglangoy sukad miposte og 24-11 nga labaw.
Padayon nga gimakmak sa Sharks ang Voyagers sa ikaduhang kuwarter aron pagpaburot sa ilang bentaha ngadto sa 22 puntos, 51-29 sa halftime.
Ang Sharks mitala sa kinadak-an nilang labaw nga 28 puntos, 59-31 sa nahibiling 5:38 sa ikatulong kuwarter.
Si Shaquille Alanes miratsada og 20 puntos, apan naminghoy gumikan kay ang Voyagers nakatilaw sa ikatulo niining sunod-sunod nga pilde ug ika-11 sa kinatibuk-an sud sa 17 ka duwa.
- Latest