Bulldogs mikuniskunis sa Uniform Solutions

CEBU, Philippines – Padayon nga nagmangtas ang Bulldogs ug ilang gikuniskunis ang Uniform Solutions sa Sunday.com 5th Conference League 2018.

Dili tiaw ang  gipakitang kabangis sa Bulldogs kay  ilang gilubong og maayo ang Uniform Solutions, 95-62  niadtong Nobiyembre 21 didto sa Mandaue City Cultural and Sports Complex.

Gumikan sa maong kadaogan, ang Bulldogs  nagsolo na sa liderato ug  mao sab ang bugtong koponan nga wala pa makatilaw og pilde sa tulo ka duwa.

Sila si Allan Bacus ug Jeric Gonzaga maoy nakapaak og dako  pinaagi sa ilang 13 puntos. Mikitoy sab ang mga kamot nilang Diosdado Apa Jr. ug Rowen Grafe nga parehong mikabkab og 12 puntos, samtang si Christopher Cabahug miingkit og 10 puntos.

Nangulo sa Uniform Solutions mao sila si Alfred Pasana ug Niel Ibarita nga mitabas og 10 puntos matag usa.

Pagsugod pa lang, nagmangtas na ang Bulldogs aron moposte og 33-8 nga bentaha sa first quarter. Wala  pa matagbaw, ila pang gibingat ang labaw ngadto sa 84-36  human ilang na-outscored ang Uniform Solutions, 41-12  sa third period nga nakapasibaw og maayo sa ilang ikatulong daog.

Sa laing duwa, ang Stallions mitumba sa Azurions, 89-81.

Si Salanthiel Gantuangco  maoy  nangu sa tulo ka double digit scorers sa Stallions sa iyang 22 puntos.

Tulo sab ka players sa Azurions ang miiskor og double figures.

Ang tinuig nga liga  nga gipadagan ni commissioner  Tata Nadera, gipaluyohan sa VECO,  Yamaha DES Strong,  Rep. Jonas Cortes, Marcaleon, Wendell Suico, Alex Malakooti, Uniform Solutions ug Mr. and Mrs. Naig.

PUNTOS MATAG USA

Unang duwa:

BULLDOGS (95) –  Bacus 13, J. Gonzaga 13, Apa Jr. 12, R. Grafe 12, C. Cabahug 10, Bustamante 6, Apa Sr. 6, T. Nadera 4, M. Abrinica 3, R. Palabay 2, M. Mosqueda 2, Cabillo 2, Antigua 2.

Uniform Solutions (62) – Pasana 10, Ibarita 10, Piano 7, Meneses 7, Ranolo 6, Andrew 6, Maisling 4, R. Mascariñas 3, Espija 2, Rendon 2, Terado 1.

Ikaduhang duwa:

STALLIONS (89) –  Gantuangco 22, Antoliaga 14, N. Galban 13, Munez 9, Taguines 8, Seno 4, Aparre 4, Ladonga 1, Montealto 1, D. Galban 1.

AZURIONS (81) – Zambo 20, Tampos 15, Rapayla 10, Bolongon 8, Mercader 6, Dela Castillo 6, Bercero 6, Pepito 4, Lapinid 4, Saludare 2.