Broner mibahad paretayron si Pacquiao
CEBU, Philippines — Sa atubangan mismo sa iyang karibal, walay kurat nga gibaharan ni Adrien Broner si Manny Pacquiao nga permanente kini niyang paretiruhon human sa ilang bugno karong Enero 19 didto sa MGM Grand Garden Arena sa Las Vegas.
Ang duha ka boksidor nag-abot sa labing unang higayon kagahapon didto s New York aron ipublikar ang umaabot nilang sangka diin panalipdan ni Pacquiao ang iyang WBA welterweight title.
Mibirada dayon si Broner sa pag-ingon nga gawas nga iyang huboan og bakus si Pacquiao, iya sab nga paretiruhon ang bugtong eight-division world champion sa kasaysayan sa boksing.
"I have paid my dues in this sport, and now it's time for me to get mine," matud pa ni Broner nga kanhi four-division world champion."I get more views than everybody when I fight. A lot of people are going to see me pack off Pacquiao into retirement, and without his belt."
Sa iyang bahin, si Pacquiao kalmado kaayong mipadayag sa iyang pagtamod ni Broner isip usa ka dekalibreng kontra nga dili niya angayan kompiyansaan.
Mao kini ang hinungdan nganong wala usa maghuna-huna si Pacquiao sa gihandum niyang "rematch" batok ni Floyd Mayweather Jr. kay adto pa punting ang iyang atensiyon ngadtong Broner.
Si Pacquiao nga mag-40 anyos na karong Disyembre 17, nagkupot og 60-7 record uban ang 39KOs, samtang si Broner dunay 33-3 nga baraha uban ang 24KOs.
Gawas nga moaway og balik sa Las Vegas sa labing unang higayon sud sa duha ka tuig, mao sab kini ang labing unang salida ni Pacquiao sukad siya nakig-alyansa ni Al Haymon nga maoy tuong kamot ug tigtambag ni Mayweather.
- Latest
