Petecio at Magno talsik sa 2nd round ng AIBA meet
MANILA, Philippines — Namaalam na rin sa kontensyon ang dalawa pang miyembro ng women’s boxing team sa 2018 AIBA Women’s World Boxing Championships na ginaganap sa KD Jadhav Indoor Stadium sa New Delhi, India.
Lumasap ng nakapanlulumong kabiguan sina dating World Championships silver medalist Nesthy Petecio (featherweight 57 kgs.) at Irish Magno (flyweight 51 kgs) sa kani-kanilang dibisyon.
Umani si Petecio ng kaduda-dudang unanimous decision loss laban kay unseeded fighter Yeni Marcela Arias Castaneda ng Colombia.
Ibinigay ng apat na European judges at isang hurado mula sa Zimbabwe ang kanilang boto sa Colombian bet sa iskor na 29-28, 30-27, 29-28, 29-28 at 29-28.
Hindi rin umubra si Magno kontra kay Chang Yuan ng China na nakakuha ng 4-1 desisyon.
Tanging ang Polish judge lamang ang bumoto kay Magno sa iskor na 29-28 habang may 29-28, 30-27, 29-28 at 29-28 desisyon ang apat na natirang hurado.
Reresbak ang dalawa pang pambato ng Pilipinas na sina Aira Villegas (bantamweight 54 kgs) at dating world champion Josie Gabuco (light flyweight 45-48 kgs.) na mapapalaban sa kani-kanilang beteranong karibal.
Lalarga si Villegas sa second round laban kay Peamwilai Laopeam ng Thailand, habang aariba naman si Gabuco laban kay Wu Yu ng China sa event na nilahukan ng 66 bansa.
Nauna nang yumuko si Carolyn Calungsod na natalo kay Caroline Veyre ng Canada sa first round ng lightweight (60 kgs) division.
- Latest
