Bulldogs nakatangag na sab og daog sa Sunday.com 5th season
CEBU, Philippines – Nakatangag na sab og daog ang Bulldogs, samtang ang Uniform Solutions midaog sab sa ikaduhang sunod-sunod nga higayon batok sa tagsa-tagsa nilang kaatbang sa Sunday.com 5th Conference League 2018.
Ang Bulldogs mihambat sa Philips Azurion sa iskor nga 98-84 ug ang Uniform Solutions mitabas sa Half Baked, 92-73 niadtong Miyerkules didto sa Benedicto College gym sa A.S. Fortuna, Dakbayan sa Mandaue.
Nagmangtas si Diosdado 'Dado' Apa Jr. ug gipangulohan ang Bulldogs pinaagi sa pagkabkab og 21 puntos. Sila si Jeric Gonzaga ug Jobus Bustamante parehong milawog og 14 puntos sa Bulldogs nga nagtangag na karon og 2-0 nga baraha.
Tulo sab ka players ang miiskor og double figures sa Azurion nga nagbitbit og 1-1 record.
Bangis kaayo ang Bulldogs pagsugod, gawas sa nagpungasi nilang opensiba, solido sab ang ilang depensa hinungdan nga ilang gilubong ang Azurion human sa first quarter sa iskor nga 32-8.
Misuway og gukod ang Azurion, apan bisan giunsa nila og paningkamot wala gyud nila maangkon ang gihandom nga daog.
Bugtong nahimo sa Azurion mao ang pagkitkit sa makabungog nga labaw ngadto na lang sa 14 puntos.
Sa laing bahin, si R. Baroman milugit og 30 puntos aron mangulo sa scoring sa Uniform Solutions.
Mipakitang gilas sab si Jamee Ervin Piano nga miamot og 16 puntos, samtang sila si Niel Ibarita ug Mitch Meneses nag-amotay og 11 ug 10 puntos matag usa.
Ang liga nga gipadagan ni ballclub president Tata Nadera, gipaluyohan sa VECO, Yamaha DES Strong, Cong. Jonas Cortes, Uniform Solutions, MarcaLeon, Wendell Suico, Alex Malahkooti ug Mr. and Mrs. Naig.
PUNTOS MATAG USA
Unang duwa:
BULLDOGS (98) – Apa Jr. 21, J. Gonzaga 14, J. Bustamante 14, Abrinica 9, Tan 6, Cabahug 6, Bacus 6, Palabay 6, Grafe 4, Mosqueda 4, T. Nadera 3, Cabillo 3, Ygot 2.
AZURION (84) – Zambo 23, Bercero 21, Del Castillo 12, Bolongon 6, Cortes 6, Saludares 4, Lapinid 3, Niez 3, Rapayla 2, Mercader 2, Tampos 2.
Ikaduhang duwa:
UNIFORM Solutions (92) – R. Baroman 30, Piano 16, N. Ibarita 11, Meneses 10, Rolono 9, R. Mascarinas 6, R. Albaracin 4, P. Malahos 4, Andrew 3, Rendon 3, Tirado 2, Pasana 2.
HALF BAKED (73) – Guillera 15, Martel 13, Manzanares 10, Monte 10, Peligrino 9, C. Cabahug 7, A. Cabahug 7, K. Cabahug 5, Cortes 4, Sanchez 4, Sampang 4, Soon 2.
- Latest
