Melo, Rockets nag-iyahay na og dalan
CEBU, Philippines – Ang hamubo nga pagtinir ni Carmelo Anthony sa Houston Rockets hingpit nga nabugto sud lamang sa 10 ka duwa.
Mao kini ang gikompirmar ni Rockets general manager Daryl Morey kagahapon.
"After much internal discussion, the Rockets will be parting ways with Carmelo Anthony and we are working toward a resolution," matud pa ni Morey sa opisyal niining pamahayag kabahin sa estado ni Anthony, usa ka 10-time All-Star.
Ang Rockets midaog og 65 ka duwa sa miaging season gumikan sa eksplosibo niining opensa, apan nagkagidlay ang ilang agi ning sayong bahin sa ilang kampanya karon nga season.
Anaa karon sila sa ika-12 nga puwesto sa Western Conference bitbit ang 6-7 record ug ang Rockets nagplano nang daan nga buhian gikan sa ilang poder si Anthony.
Si Anthony, ang No. 3 overall sa Denver Nuggets niadtong 2003 NBA Draft, mipirma og kontrata uban sa Houston isip usa ka free agent karong tuiga sa tinguha nga tabangan ang Rockets nga mamahimong usa ka lig-ong title contender.
Ang 34-anyos nga forward usa sa 11 lamang ka players sa kasaysayan sa NBA nga duhay career average nga 24.0 points, 6.0 rebounds ug 3.0 assists. Usa sab siya ka three-time Olympic gold medalist.
- Latest