Warriors kaging sa Rockets

CEBU, Philippines – Gilampurnas sa Houston Rockets ang two-time defending NBA champion Golden State Warriors, 107-86 atol sa "rematch" sa Western Conference Finals sa miaging season.

Gipahimuslan og maayo sa Rockets ang higayon nga wala sa Stephen Curry, ang alas sa Warriors nga kaupat na wala makaduwa kay nagpaalim pa sa iyang injury.

Nakab-ot sa Rockets ang impresibong daog pipila ka minuto sa wala pa gipahibawo sa ilang general manager nga si Daryl Morey nga gibugto na sa Rockets ang ilang relasyon ngadto ni 10-time All-Star Carmelo Anthony (basaha ang lahing estorya).

Sa labing unang higayon sukad niadtong Marso 2013, walay bisan usa sa mga starters sa Warriors ang nakaigo og tres. Sila si Draymond Green, Kevin Durant ug Klay Thompson nabokya sa gibuhian nilang siyam ka 3-pointers.

Human gitak-op ang first half bitbit ang sayes puntos nga labaw, 47-41, misamot pa og kabangis ang Rockets nga mipabuto og 21-2 nga bomba sa katapusang kuwarter nga maoy nakabugha sa Warriors.

Si James Harden maoy nangu sa Houston uban ang 27 puntos, samtang sila si James Ennis, Chris Paul ug Clint Capela mihipos og 10 puntos matag usa. Si Paul milangkat sab og lima ka rebounds, pito ka assists, tulo ka steals ug duha ka blocks.

Si Durant maoy nangu sa Warriors uban ang 20 puntos, apan si Thompson naangklahan ngadto lamang sa 10 puntos.

Didto sa Denver, ang Nuggets misanta sa upat ka sagunson nilang pilde ug gipahimungtan niini sa ilang kayugot ang Atlanta Hawks 138-93.

Si Juancho Hernangomez mibahog og season-high 25 puntos, samtang sila si Paul Millsap ug Gary Harris mikadlit og 18 puntos matag usa alang sa Nuggets.

Samtang ang Los Angeles Clippers nakasugakod batok sa San Antonio Spurs, 116-111 alang sa ikatulo nilang sunod-sunod nga daog.

Si Lou Williams mipupo og 23 puntos, apil na ang krusyal nga tres sa nahibiling 40 segundos sa duwa nga maoy nahimong yawi sa ilang kalampusan.