Lady Altas mapapalaban agad sa Red Lioness
MANILA, Philippines — Sisimulan ng University of Perpetual Help Lady Altas ang kanilang asam sa titulo sa pagharap kontra sa San Beda Red Lioness sa pagbubukas ng Season 94 NCAA women’s volleyball tournament ngayong Nobyembre 23 sa FilOil Flying V Center sa San Juan City.
Nagpahayag ng malaking tiwala si UPHSD women’s volleyball coach Macky Carino sa kakayahan ng kanyang koponan na makopo ang titulo sa taong ito.
Pangungunahan ni dating La Salle-Taft middle blocker Lourdes Clemente ang kampanya ng Lady Altas kasama sina team captain Yanca Tripoli at setter Necelle Gual, outside spikers na sina Cindy Imbo, Jhona Rosal, middle blockers Shyra Umandal at rookie Jenney Gaviola na kalilipat lamang mula sa St. Francis of Assisi College at libero Alyssa Sangalang.
Kabilang din sa bagong rosters ng Lady Altas ang mga talented rookies na sina Sandra Dayao na isa ring transferee galing sa FEU-Manila, Janie Padua mula sa Eastern Pangasinan Agriculture College, 18-anyos na si Hannah Suico mula sa Notre Dame-Dadiangas at Charina Scott ng Naic, Cavite.
Ang ibang miyembero ng team ay sina Angielou Castillo, middle blocker Hershey Llorente at libero Jowie Albert Verzosa.
Hangad ngayon ni Carino na lampasan ang kanilang semifinal finish noong nakaraang taon kung saan natalo sila sa SBU Lioness sa cross-over semifinal round sa straight sets. Tumapos sila sa 7-2 win-loss kartada sa elimination round.
Huling inangkin ng Las Piñas-based Lady Altas ang korona sa NCAA noong 2014 matapos ang back-to-back championships noong 2012 at 2013 sa panahon pa nina Royce Tubino, April Sartin, Jane Diaz at Sandy De Los Santos.
Inihanay ni Carino ang nagdedepensang Arellano Lady Chiefs, CSB Lady Blazers at SBU Lioness sa mga mabibigat na mga kalaban para sa titulo sa Season 94 ng NCAA.
Maghaharap ang Lady Altas at ang runner-up noong nakaraang taon na Red Lioness sa alas-2 ng hapon habang ang reigning champion Arellano Lady Chiefs at Jose Rizal University Lady Bombers ay magtatagpo sa alas- 12 ng tanghali.
- Latest