Island hot wings daog gyud

CEBU, Philippines – Namunga ang mga paningkamot sa Island Hot Wings ug midaog gyud kini sa ligas kaayo  nila nga duwa batok sa Z&G Pro Audio, 73-71 sa FYA Basketball Tournament (Season 22) Pastrano's Special Chicharon Cup 2018 niadtong Martes didto sa Atillo gym.

Kuyaw kaayo nga nakaduwa si Ranel 'The Tank' Patalita ug  mihimo  kini'g  'triple-double' aron mangulo sa scoring sa Island Hot Wings.

Si Patalita mirehistro og 15 puntos, milangkat og 13 ka rebounds ug 13 sab ka assists aron tahuron isip 'best player of the game.'

Ligas kaayo ang  duwa gikan sa pagsugod ug diha na maklaro ang daog sa Island Hot Wings sa himalatyong segundos sa fourth quarter.

Sila si Daniel Enriquez, Christian Laud ug Jeramie Flores dako sab og natampo sa kadaogan sa Island Hot Wings ni playing team manager  Junrey Arreglo ug team owner Atty. Grace Bactol nga nagsolo na  sa liderato sa ilang 5-2 record.

Ang Z&G  nilang Dave Natividad ug Macky Macachor gipangulohan nilang Dexter Caballero ug Mervin Manila nga parehong miantog og 19 puntos.

Sa sayo pa, ang Yoyi's Pastries & Desserts ni Ahlmark Albarracin midaog human ma-forfeit ang Baran Brothers ni Tiny Baran.

PUNTOS MATAG USA

ISLAND Hot Wings (73) – Patalita 15, D. Enriquez 14, Laud 11, Flores 10, J. Arreglo 8, V.A. Ensong 8, G. Noquillo 4, Arias 3.

Z&G Pro Audio (71) – D. Caballero 19, Manila 19, Regudo 9, Macachor 5, Dechosa 4, Ares 4, Tolentino 4, Caballes 3, Trocio 2, Quintos 2, Natividad 1.