Green gisuspenso sa Warriors

CEBU, Philippines – Gisuspenso og usa ka duwa sa Golden State Warriors ang  All-Star forward nilang si Draymond Green human sa nahitabong panagbangi nila ni Kevin Durant.

Segun sa opisyal nga pamahayag sa two-time defending champion, ilang gisilotan si Green gumikan sa binuhatan niini nga makadaut sa ilang koponan.

Gumikan niini, si Green kutob na lamang sa pagpasinaw sa ilang bangko atol sa ilang duwa batok sa Atlanta Hawks kagahapon.

Atol sa ilang kapildihan ngadto sa Los Angeles Clippers niadtong Martes, si Green makita nga nagkalalis ug si Durant sa hinapos nga bahin sa katapusang kuwarter.

Klaro kaayo nga naglagot si Durant gumikan sa pagsige og kupot ni Green sa bola inay nga ipasa ngadto kaniya sa katapusan nilang posisyon nga posible pa untang makapadaog kanila.

Resulta naparot ang Warriors sa overtime, 121-116.

Segun sa taho sa ESPN nga padayong nagkomprontasi sila si Durant ug Green hangtod sa ilang locker room human sa duwa. Gani pipila ka teammates ni Green ang misaway sab sa iyang gibuhat kay giukoban man hinuon niini ang bola imbes nga ipasa kini ngadto Durant.