Dunk ni James mipadaog sa Lakers

CEBU, Philippines — Ang hagpok nga dunk ni LeBron James sa himalatyong segundos sa duwa maoy nakapadaog  sa Los Angeles Lakers batok sa  Atlanta Hawks, 107-106  sa NBA kagahapon  didto sa  Staples Center sa Los Angeles, California.

Si LeBron James miiskor og 26, samtang si Kyle Kuzma miamot og 18 puntos alang sa Lakers nga midaog na og kalima sa katapusan nilang unom ka duwa. lay-up ni Kuzma nakatabla sa iskor, 104-104 sa  katapusang 1:34 sa aksiyon.

Human matawgi si Kent Bazemore og technical foul, gipasud ni Kuzma ang iyang free throw aron pagpalabaw sa Lakers, 105-104, apan si Vince Carter mihansak sa bola sa ilang posisyon aron pagpaabante og balik sa Hawks, 106-105.

Sa ilang opensa, si James gi-foul, apan nasipyat ang duha niini ka free throws, hinuon nakuha sa Lakers ang offensive rebound ug si Kuzma miitsa bisan og gidepensaan og tulo ka players sa Atlanta. Nasipyat ang tira ni Kuzman, apan nakuha ni James ang bola dayong hansak niini aron pagpalutaw sa Lakers ngadto sa panganod sa himaya.

Si Taurean Prince dunay 23 puntos, samtang sila si Bazemore ug Trae Young nagkumboya'g  41 puntos sa nabihag nga Hawks.

Didto sa Houston, si James Harden mipatuasik og season-high 40 puntos ug si Chris Paul midugang og 26 puntos sa dihang gipakaging sa Rockets ang Indiana Pacers, 115-103 alang sa labing una nilang daog didto sa ilang korte karon nga season.

Miamot si Clint Capela og 18 puntos ug pito ka rebounds sa Rockets nga misanta sa upat ka sagunson nilang pilde didto sa ilang balwarte.

Daw sa mibalik sab ang pagkabatan-on ni Tony Parkers human kini miratsada og 24 puntos aron pangulohan ng Charlotte Hornets ngadto sa 113-103 nga kadaogan batok sa Detroit Pistons, 113-103.

Si Kemba Walker dunay sa'y 24 puntos ug si Cody Zeller mibahog og 14 puntos alang sa Hornets nga midaog katulo ka katapusan nilang upat ka duwa.

Sa laing resulta, si Damian Lillard mipupo og 19 puntos ug 12 ka assists sa dihang gitumba sa Portland TrailBlazers ang Boston Celtics, 100-94 alang sa ikaupat nilang sunod-sunod nga daog.

Si Jusuf Nurkic mikamada og 18 puntos uban ang 17 ka rebounds alang sa TrailBlazers nga milampos kapito sa miagi nilang walo ka duwa. (BANAT NEWS)