Lebron, Lakers nagbangis

CEBU, Philippines — Mihimo sa labing dakung daog ang Los Angeles Lakers uban ni superstar LeBron James human nila gimasaker ang Sacramento Kings, 101-86, kagahapon didto sa Sacramento, California.

Ang Lakers nga misugod sa ilang season sa 0-3 nga baraha, milambo karon sa 6-6 win-loss record diin miduol sila sa ikawalong dapit sa Western Conference division.

Si James mihimo og team-high 25 points, pito ka rebounds ug duha ka assists, apan maisip nga dako og natampo ang veteran center ug bag-o lang nahimong sakop sa Lakers nga si Tyson Chandler kinsa milangkat og 12 ka rebounds ug mihimo og mga krusyal nga defensive players.

Ang Lakers labaw lang og sayes puntos sa first half, apan gipaburot nila kini ngadto sa 20, 88-68, human sa rally nga gibidahan ni James. Ang sophomore player sa Kings nga si De'Aaron Fox mipakita og nindot nga duwa diin siya miiskor og 21 puntos, apan dili kini igo aron tabangan iyang koponan.

Samtang didto sa Oracle Arena, ang defending champion Golden State Warriors nakahimo pagrehistro og dominanteng kadaugan batok sa Broolyn Nets, 116-110, bisan pa og wala ang usa sa ilang star player nga si Stephen Curry kinsa adunay injury.

Si Kevin Durant mirehistro og double-double nga 28 puntos ug 11 ka assists, samtang ang reserve guard nga si Quinn Cook adunay 27 puntos aron pangulohan ang Warriors.

Gawas ni Curry, wala usab kaduwa ang forward nga si Draymond Green tungod gihapon sa injury, apan si coach Steve Kerr salig sa iyang mga reserbang players nga mao usa ang mobanat alang sa koponan.

Laing duha ka contenders sa West nga San Antonio Spurs ug Dallas Mavericks ang mihimo usab og mga dagkung daog batok sa mga lig-ong kaatbang.

Ang Spurs gibidahan ni LaMarcus Aldridge nga adunay 27 puntos ug 10 ka rebounds dihang ilang gilugwayan ang kasakit sa Houston Rockets, 96-89.

Ang Rockets nga gitan-aw nga usa ka pwersa sa West nakatilaw karon sa ikapito nilang pilde.

Sa ilang bahin, ang Mavericks nimakmak usab sa Oklahoma City Thunder, 111-96. Ang rookie nga si Luka Doncic midiga og 22 puntos alang sa Mavs nga sayun mipilde sa Thunder tungod kay wala ang star player niini nga si Russell Westbrook. (BANAT NEWS)