Butler molayat sa 76ers gikan sa Minnesota
CEBU, Philippines — Natuman na ang dugay nga gipangayo ni All-Star Jimmy Butler nga mohawa sa Minnesota Timberwolves human gi-trade siya sa koponan ngadto sa Philadelphia 76ers bugti nila ni Dario Saric ug Robert Covington.
Nasayran nga sa wala pa magsugod ang season, si Butler una nang mipadayag sa iyang gusto nga muhawa sa Wolves, apan nalangan kini tungod kay dugay nakakita og koponan ang Wolves nga musugot makig-trade kanila.
Wala pa mahimong opisyal ang maong trade tungod kay nagkinahanglan pa kini og pagtando gikan sa NBA Commissioner's office, apan pulos positibo ang matag kampo nga matugtan ra sila sa panagbaylo nila og players.
Ang Wolves pabor sa ilang pagkuha ni Saric ug Covington kinsa pulos kasaligan nga key players nga makatabang kanila aron mahaw-as gikan sa lisud nga Western Conference.
Sa ilang bahin, ang Sixers maisip karon nga aduna nay 'Big Three' tungod kay si Butler mamahimong bag-ong star sa koponan sunod nila ni Ben Simmons ug Joel Embiid.
Si Butler mi-average og sobra sa 25 puntos karon nga season ug nakita sa mga kadagkuan sa Sixers nga siya na ang gipangita sa koponan aron makuha ang dugay na nilang gihandum nga finals appearance.
Sa miaging season, ang Sixers miabante sa semis sa East Conference sa wala pa sila tagaka sa Boston Celtics. (BANAT NEWS)
- Latest
