Ginebra mobawos
CEBU, Philippines — Panimalos ang tuyo sa top seed Barangay Ginebra Kings karon sa Game 2 sa ilang best-of-five semifinals series batok Magnolia Hotshots didto sa Smart Araneta Coliseum.
Ang Ginebra gipakuratan sa Magnolia sa Game 1 niadtong Sabado diin sila gilubong sa ilang igsuong koponan, 98-106.
Si Ginebra coach Tim Cone miangkon nga wala sila kasagang sa kusug nga atake sa Magnolia ug gusto niya nga mabawi dayun kini karon. "They played the game they wanted to play. We played their game, so we got to be better," matud pa ni Cone sa PBA.com.
Si Cone nagkanayon nga yawi sa kadaugan sa Hotshots batok kanila ang nindot nga depensa nga gipahamtang sa ilang kaatbang sa iyang star center nga si Greg Slaughter nga igo lang nakahimo og otso puntos. Ang Cebuano star bigman gipuli-pulihan og bantay nila ni Ian Sangalang, Rafi Reavis ug Kyle Pascual rasun nga naluya kini.
Si Cone mihangyo sa uban niyang sinaligan nga mopakita pa og paningkamot aron makatabang. Ang import nga si Justin Brownlee mirehistro og 37 puntos, apan dili kini igo aron ihatag ang daog sa Ginebra. (BANAT NEWS)
- Latest
