Jerusalem mikulata ni Landero sa IDOL 4

CEBU, Philippines — Mas mipatigbabaw ang abilidad ug kaiglas ni one-time world title challenger Melvin 'Gringo' Jerusalem aron makuha ang unanimous decision nga kadaugan batok ni Toto Landero atol sa main event sa 'IDOL 4' boxing series niadtong Sabado sa gabii didto sa Minglanilla Sports Complex.

Ang ALA Boxing Gym fighter mipalambo sa iyang rekord ngadto sa 14-2, 8KOs, samtang si Landero nakatilaw sa ikaupat niyang pilde sa 14 ka sangka.

Si Landero, kinsa usa usab ka former world title challenger, gipaabot unta nga muhatag og lisud nga pagsuway ni Jerusalem, apan daling nakahimo og solusyon ang ALA boy sa agresibo nga atake sa pambato sa Muntinlipa City.

Si Jerusalem mipakita nga siya ang mas tactical fighter human niya gigamit iyang jabs ug hait nga kombinasyon aron pauwanan  og puntos si Landero. Misamot kalagsik si Jerusalem sa katapusang rounds diin iyang gidabo-dabohan si Landero nga maoy mipasamot pagkumbinsir sa mga hurado nga ihatag kaniya ang daog human sa 10 ka rounds nga binukbukay.

Tulo ka mga judges ang mihatag og 98-92, 97-93, 98-92 pabor tanan ni Jerusalem.

Sa supporting main event, laing ALA prospect nga si Esneth Domingo midaog usab pinaagi sa unanimous decision batok ni Reymark Taday, apan ang ikatulong ALA boxer nga misaka sa ring nga si Christian Bacolod nakasugat og lisud nga away batok ni Christoval Furog. Si Bacolod mmidaog pinaagi sa split decision. (BANAT NEWS)