Sunday.com 5th season sugdan na
CEBU, Philippines — Dili na gyud kapugngan, ipahigayon na ang pormal nga pagbukas sa Sunday.com 5th Conference Basketball Tournament karong adlawa diha sa Mandaue City Cultural and Sports Complex.
Sa naandan, usa ka tradisyonal nga parada nga pagasalmotan sa mga partisipanteng koponan uban sa tagsa-tagsa nila ka maanyag nga musa maoy mosikad sa maong kalihukan sa alas 12:30 sa udto ug isunod dayon ang mubo nga programa.
Ang presidente nga si Camelo 'Tata' Nadera uban sa iyang bise presidente ug adviser nga si Atty. Gonzalo 'Sally' Malig-on gipaabot nga mohatag sa ilang tagsa-tagsa ka mahinungdanon nga mensahe atol sa maong programa.
Molamas sa maong kalihukan mao ang pagpili og "best muse" ingon man "best in uniform".
Pito ka koponan ang mosalmot ning tuiga nga pangulohan sa team Alitz ug mortal ka karibal niining Bulldogs. Lain pang mopakita'g aksiyon ning tinuig nga liga mao ang Uniform Solutions, Stallions, Half Bake, 1Med ug Philips Azurion.
Matud pa ni Nadera nga ang torneyo motamod sa barangayan format.
Ang mga teams moduwa og single round robin format diin ang top four moabante sa crossover semifinals. Ang mga modaog maoy mag-abot sa kampiyonato karong Disyembre.
Ang awarding ceremony usahon atol sa tinuig nga Christmas Party sa Sunday.com ballclub.
- Latest