Pinoy bag-ong MMA world champion

CEBU, Philippines — Ang Pinoy nga si Kevin Belingon maoy  gibayaw nga bag-ong mixed martial arts world champion  human  midaog pinaagi sa 'split decision' batok sa  Brazilian superstar  nga si Bibiano Fernandez sa  "One Fighting Championship"   niadtong miaging gabii didto sa Singapore Indoor Stadium.

Gamay ra ang mihatag og tsansa ni Belingon nga modaog tungod  kay  walo ka tuig na nga wala mapilde si Fernandez   ug  giisip nga numero unong  fighter  sa MMA. Apan mipakita sa iyang kabangis ang Pinoy ug nalupig niya sa sinukliay og kumo ug patid si Fernandez. Misuway pagamit sa iyang abilidad sa grappling si Fernandez, apan nadepensaan kini og maayo ni Belingon ug napugos ang Brazilian nga makigbinukbukay kaniya. 

Si Belingon, lumad nga taga-Benguet, nahimong ikaupat nga Pinoy MMA world champion sunod nila ni Fil-American Brandon Vera, Jeje Eustaquio ug Joshua Pacio.