Jazz daog sa Celtics
CEBU, Philippines — Mitunob og balik sa Utah si All-Star Gordon Hayward sukad nga mibalhin siya didto sa Boston, apan usa ka sakit nga kapildihan ang nahiaguman niya kay nasugamak ang Celtics ngadto sa Jazz, 115-123 sa duwa nila sa National Basketball Association kagahapon didto sa Salt Lake City sa Utah.
Si Hayward, ang kanhi sinaligan sa Jazz sa wala pa milayat sa Celtics niadtong miaging season mihimo og 13 puntos, apan kuwang pa kini aron mapadaog niya ang iyang koponan.
Si Joe Ingles mipabuto og career-high 27 puntos aron pangulohan ang iyang koponan nga Jazz, samtang sila si Donovan Mitchell ug Jae Crowder mitampo'g 21 ug 21 puntos matag usa.
Ang Celtics ang gitan-aw nga top team sa Eastern Conference sa wala pa magsugod ang season nakahiagum karon sa ikalima nilang pilde sa 12 ka duwa ug natagak sila sa ikalimang dapit sa standing.
Nangulo sa Celtics si Terry Rozier nga adunay 22 puntos, samtang si Jayson Tatum adunay 21 puntos. Wala paduwaa sa Celtics si Kyrie Irving, kinsa gipapahuway tungod sa pagsakit sa tiil niini.
Didto sa Philadelphia, ang 76ers nanginahanglan pa og overtime aron pagpukan sa Charlotte Hornets, 133-132.
Ang All-Star center nga si Joel Embiid mirehistro og 42 puntos ug milangkat ug 18 ka rebounds aron pangulohan ang Sixers.
Sa ubang mga duwa, ang Brooklyn Nets nakaipsot sa Denver Nuggets, 112-110, gipatapsingan sa Sacramento Kings ang Minnesota Timberwolves 112-110, gilubong sa Orlando Magic ang Washington Wizards, 117-108, ang Indiana Pacers mipabugnaw sa Miami Heat, 110-102 ug ang Detroit Pistons mibihag sa Atlanta Hawks, 124-109.
- Latest
