Bolts sasagupa sa Aces

Sinibak ang fuel masters

MANILA, Philippines — Sadyang matibay ang puso ng Meralco.

Bumangon ang Bolts mula sa 16-point deficit sa second quarter para resbakan ang Phoenix Fuel Masters sa overtime, 108-103 sa kanilang ‘do-or-die’ game para pitasin ang ikaapat at huling tiket sa semifinal round ng 2018 PBA Governor’s Cup kagabi sa Smart Araneta Coliseum.

Nagsilbing sandata ng Meralco sina two-time PBA Best Import Allen Durham, shooting guard Baser Amer at veteran forward Reynel Hugnatan sa extra period para tuluyan nang sibakin ang Phoenix.

Nauna nang tinalo ng Bolts ang Fuel Masters, 90-74 noong Miyerkules para itulak ang ‘sudden death’.

Sa pagsibak sa Phoenix, lalabanan ng Meralco ang Alaska sa isang best-of-five semifinals series na magsisimula bukas.

Nagposte ang Fuel Masters ng 46-30 bentahe sa second period hanggang mauwi sa extra period ang laro matapos isalpak ni rookie Jason Perkins ang isang three-point shot sa huling 7.4 segundo sa fourth quarter para makatabla sa Bolts sa 94-94.

Sa overtime ay kinuha ng Bolts ang 106-100 bentahe sa nalalabing 32.6 segundo na sinundan ng triple ni Matthew Wright para idikit ang Phoenix sa 103-106 sa huling 20.1 segundo.

Ang dalawang free throws ni Durham ang tuluyan nang sumelyo sa panalo ng Bolts.

Samantala, bubuksan ng nagdedepensang Barangay Ginebra at Magnolia ang Game One ng kanilang best-of-five semis duel ngayong alas-6:30 ng gabi sa Ynares Center sa Antipolo City.

Kaagad dinispatsa ng No. 1 Ginebra ang No. 8 NLEX, 111-75  habang sinibak ng No. 3 Magnolia ang No. 6 Blackwater, 103-99.