CRV nakakaplag na gyud og daog

CEBU, Philippines — Nakaplagan na gyud sa CRV ang nagtagotago nga daog  sud sa lima nila ka duwa sa FYA Basketball Tournament Season 22 Pastrano's Special Chicharon Cup 2018.

Dili basta-basta ang kadaogan sa CRV ni Christian Roy Villacastin kay ila  nga gilubong ang Baran Brothers ni Tiny Baran, 95-71 niadtong Domingo sa buntag diha sa Atillo gym sa Labangon, Dakbayan sa Sugbo.

Si Bryce 'The Lethal Weapon' Tabaña nga mikabkab og 33 puntos maoy nangulo sa kadaogan ug mao sab ang 'best player of the game'.

Sila si Stephen Lumagbas, Alex Endrina ug Jaybee Silvano nakahimo sab og double figures sa CRV, kansang 31-28 nga labaw sa halftime gikalingawan og bingat ngadto na sa 24 puntos nga masaker sa Baran Brothers.

Upat sab ka players sa Baran Brothers ang mikadlit og double figures pinangulohan ni Dodie De Gracia pinaagi sa iyang 21 puntos, gisundan ni Derek Tabares nga adunay 18 puntos, Isyot Regudo sa iyang 14 puntos ug Jovito Tabares nga miambit og 10 puntos.

Sa pasiunang duwa, ang Z&G Pro Audio  mipilde sa Ejay & Ejean Sportswear, 101-98 pinaagi sa overtime aron magpabiling lider sa liga uban ang 4-1 nga baraha.

Si Socrates 'Mr. Excitement' Trocio  maoy best player of the game nga mipabuhagay og 25 puntos. Gawas ni Trocio, si Dexter Caballero miantog sab og 25 puntos, samtang si Angelo Regudo mitikdol og 19 puntos sa Z&G Pro Audio nilang Dave Natividad ug Macky Macachor nga nahulga dihang ang ilang 41-29 nga bentaha sa halftime napapas sa human sa unang tulo ka kuwarter, 63-67.

Dumadaog unta ang Ejay & Ejean Sportswear ni Noel Medalle, apan wala pakyas si Toper Marata pagpasud sa iyang bonus free throw sa nahibiling tres segundos sa duwa.

Wala na sab mobalik og duwa ang bigman nga si Noel Medalle tungod sa injury sa tiil nga dako unta og purohan nga makakuha sa rebound.

Si Marata miiskor og 28 puntos, apan si Juvinelle Enriquez maoy topscorer sa napildeng Ejay & Ejean sa iyang 29 puntos.

Ang Ejay & Ejean laraw nga mobangon sa ilang pakigsangka batok sa Harold's Hotel karong alas-7 sa gabii, samtang ang Z&G Pro Audio  tinguha sab nga moinat sa ilang baraha batok sa Angel Mary Pawnshop sa alas-9:30 sa gabii.

Puntos Matag Usa

Unang duwa:

CRV (95) – Tabaña 33, Lumagbas 14, A. Endrina 12, Silvano 10, C. Sanchez 8, Demol 7,  Dela Peña 5, Reubal 4, Ancla 2.

BARAN Brothers (71) – De Gracia 21, D. Tabares 18, I. Regudo 14, J. Tabares 10, Villarosa 8.

Ikaduhang duwa:

Z&G Pro Audio (101) – Tracio 25, Caballero 25, A. Regudo 19,  Aries 9, Laput 8, Dechosa 8, M. Macachor 7.

EJAY & EJEAN Sportswear (98) –  J. Enriquez 29, Marata 28, Sabijon 8, Labrador 8, N. Medalle 6, AJ Abella 6, Dacayana 5, R. Tabares 4, T. Abella 4. (BANAT NEWS)