World title tuyo ni Donaire
CEBU, Philippines — Suwayan ni four-division world champion Nonito Donaire sa pagpahumot og balik sa iyang pangan sa dihang harungon na niya si WBA super bantamweight champion Ryan Burnett sa Ireland karong adlawa didto sa Glasgow, Scotland.
Tinguha ni Donaire nga ipakita nga aduna pa siya'y ikabuga aron mamahimong world champion pag-usab, apan lisud nga misyon ang iyang sagubangon.
Krusyal kining maong away alang ni Donaire kay kun ugaling mapakyas siya lagmit mao kini ang magtukmod kaniya ngadto sa pagretiro.
"The fight against Ryan Burnett may definitely be Donaire's last hurrah. He is 35 and is clearly no longer in his prime years," matud pa ni boxing analyst Ed Tolentino segun sa taho sa ABS-CBN.
Si Donaire nagbitbit og 38-5 record uban ang 24KOs, samtang si Burnett wala pa'y pilde sa 19 ka away uban ang 9KOs.
Mas makabentaha hinuon si Donaire kun kasinatian maoy hisgutan ug tataw nga mao kini ang iyang pahimuslan aron kab-uton ang gihandum niyang daog nga segurado nga makapasulbong og balik sa iyang pangan.
- Latest