Angel Mary Pawnshop mipaluhod sa Yoyi's Pastries

CEBU, Philippines — Mipakita og milagro ang Angel Mary Pawnshop  ug   gipaampo nila ang  Yoyi's Pastries & Desserts, 88-73 sa ilang duwa sa FYA  Basketball Tournament Season 22 Pastrano's Special Chicharon Cup 2018 niadtong Martes sa gabii didto sa Atillo gym sa Labangon, Dakbayan sa Sugbo.

Walay kulba nga milansang sa ilang ikatulong daog ang Angel Mary Pawnshop kay sila  ang midiktar sa kinatibuk-ang duwa.

Gilubong pa gani nila ang Yoyi's Pastries & Desserts  og 14 puntos sa halftime sa iskor nga 48-34.

Si Jay-R 'Master Rapper' Laurente nga maoy 'best of the game' maoy nangu sa Angel Mary Pawnshop pinaagi sa iyang 24 puntos uban ang unom ka rebounds, lima ka assists ug upat ka steals.

Gisundan kini sa team manager  niini    nga si McLain Alkuino nga miambit og 15 puntos, si Ryan Villaver mitimbre og 14 puntos, samtang si Albert Encarguez mitali og 11 puntos sa Angel Mary Pawnshop nga temporaryo nakigsawo sa unang dapit uban sa Z&G Pro Audio sa managsama nilang 3-1 win-loss records.

Lima lang ka players ang nakaiskor sa Yoyi's Pastries, apan parehong naka-double digits.

Gipangulohan kini ni Reyboy Caballes nga mikamada og 19 puntos, gisundan nilang Julz Aglipa ug Charles Limbaga nga parehong misansan og 16 puntos ug nila ni Bakang Aglipa ug team manager Ahlmark Albaraccin nga mihaling og 11 puntos matag usa alang sa Yoyi's Pastries & Desserts nga mipahiluna sa ikalima nga dapit bitbit ang 1-3 nga baraha.

Sa laing aksiyon, ang Harold's Hotel miiskor og 'come-from-behind' nga kadaogan sa kulbahinam nilang duwa batok sa Island Hot Wings sa iskor nga 77-74.

Tataw kaayo nga naglisud ang Harold's Hotel sa maong duwa hinungdan nga gilubong sila og 20 puntos human sa first period, 9-29 ug ingon man sa halftime,  22-42. Apan wala kini makapaluya kanila, inay nadasig hinuon kini sa pakiglahugay hangtod nga nakaeskapo sa hinapos nga bahin sa duwa.

Ang 2-2 nga Harold's Hotel ni Arnel Trinidad, gipangulohan ni Wendell 'Viking' Rollon nga mirehistro og 'triple-double' uban ang 17 puntos, 12 ka rebounds, 11 ka assists, unom ka steals ug lima ka blocked shot.  Nakakuha sab siya og igong suporta gikan ni  Edgemar Jumantoc nga miantog og 14 puntos ug nilang Jade Ursal ug Nene Billiones nga nagkumboya'g 24 puntos.

Bugtong si Daniel Enriquez lang ang miiskor og double figures sa Island Hot Wings sa iyang 29 puntos. 

Bisan pa sa maong kapildihan, ang Island Hot Wings ni playing team manager Junrey Arreglo ug team owner Atty. Grace Bactol  nagpabilin gihapon sa ikaduhang dapit sa standing bitbit ang 3-2 nga baraha.

PUNTOS MATAG USA

Unang duwa:

ANGEL Mary (88) – Laurente 24, Alkuino 15, R. Villaver 14, A. Encarguez 11, Rara 9, Samson 5, Masongsong 4, D. Rama 4, Montillero 2.

YOYI's Pastries (73) – Caballes 19, J. Aglipa 16, Limbaga 16, Albarracin 11, B. Aglipa 11.

Ikaduhang duwa:

HAROLD's Hotel (77) – Rollon 17, Jumantoc 15, Ursal 14, Billiones 10, Celestial 8, Dacayana 7, B. Endrina 6.

ISLAND Hot Wings (73) – D. Enriquez 29, Patalita 9, Flores 9, Ensong 8, J. Arreglo 5, Sy 5, Baltonado 4, Garcia 4.