Island Hot Wings mikatkat unang dapit sa FYA

CEBU, Philippines — Walay puangod nga gilubong sa Island Hot Wings ang Yoyi's Pastries & Desserts, 71-58 aron makigsawo sa liderato uban sa Z&G Pro Audio sa managsamang 3-1 nga baraha sa nagkainit  nga aksiyon sa FYA Basketball Tournament Season 22 Pastrano's Special Chicharon Cup 2018 nidtong Domingo diha sa Atillo gym sa Labangon, Cebu City.

Si Jeramie 'The Beast' Flores nga maoy  napiling 'best player of the game' mao sab ang nangulo sa Island Hot Wings ni team owner Atty. Grace Bactol nga mirehistro og 17 puntos ug milangkat sab 17 sab ka rebounds  uban ang tulo ka assists.

Silang Daniel Enriquez ug Ranel Patalita nagkumbinar og 21 puntos sa Island Hot Wings, kansang nagpungasi   nga  ataki sa fourth quarter nakapalubong sa Yoyi's Pastries & Desserts.

Si Juls Aglipa migaling og 14 puntos, samtang si Reyboy Caballes misansan og 13 puntos sa napildeng Yoyi's Pastries & Desserts ni Ahlmark Albarracin nga aduna na'y 1-2 record.

Sa laing bahin, ang Angel Mary Pawnshop  ni McLain Alkuino mikulit sa ikaduha nilang daog human makaipsot sa kulbahinam nilang duwa batok sa CRV ni Christian Roy Villacastin sa iskor nga 73-71.

Ang tres ni Val Ramirez gikan sa assist ni Ryan Villaver  sa nahibiling sayes maoy nakaluwas sa Angel Mary Pawnshop.

Gihatagan unta og higayon ang CRV nga makatabla sa iskor, apan mikagar ang tira ni Kier dela Peña hinungdan sa ilang pagkatiurok sa ikaupat  nga sunod-sunod nga higayon.

Mipabuhagay og 26 puntos si Val 'The Assassin' Ramirez aron mangu sa scoring sa Angel Mary Pawnshop. Gawas pa niini, si Ramirez milangkat sab og 10 ka rebounds ug mihatag og siyam ka assists aron ilhon nga 'best  player  of  the game'.

Laing naka-double digits sa 2-1 nga Angel Mary Pawnshop mao sila si Jim Rara ug Villaver nga adunay 12 ug 11 puntos.

Ang CRV nga mao na lang ang bugtong team nga wala pa'y daog sa upat ka duwa, gipangulohan nilang Boyet Demol ug Emman Reubal nga nagkumboya'g 30 puntos.

Puntos Matag Usa

Unang duwa:

ISLAND Hot Wings (71) – Flores 17, D. Enriquez 11, R. Patalita 10,  Laud 6, Sy 5, VA Ensong 5, J. Arreglo 4, Arias 4, Garcia 3, E. Noquillo 2, G. Noquillo 2, Baltonado 2.

YOYI's Pastries (58) – J. Aglipa 14, R. Caballes 13, Albarracin 9, Hanginon 7, B. Aglipa 6, Limbaga 5, Mata 2, Salvador 2.

Ikaduhang duwa:

ANGEL Mary (73) – Ramirez 26, Rara 12, R. Villaver 11, Montillero 8, Rama 6, Laurente 4, Samson 2, Masongsong 2, A. Encarguez 2.

CRV (71) –  Demol 16, Reubal 14, A. Endrina 11, Ancla 9, Tabaña 6, Lumagbas 6, Villacastin 4, Dela Peña 2, Silvano 2, Tan 1. (BANAT NEWS)