Bucks hiniya ang Knicks

MILWAUKEE — Kumolekta si superstar forward G­iannis Antetokounmpo ng 31 points at 15 assists habang nagsalpak si Khris Middleton ng dalawang ma­halagang three-pointers para tulungan ang Bucks na talunin ang New York Knicks, 124-113.

Tumapos si Middleton na may 30 points tampok ang 7-of-8 shooting sa 3-point range para sa panalo ng Milwaukee.

Ang triple ni Middleton sa huling 2:22 minuto ang nagbigay sa Bucks ng 116-110 abante at hindi na nakalapit ang Knicks.

Nagdagdag si Eric Bledsoe ng 16 points habang may 13 at 11 markers sina center Brook Lopez at guard Malcolm Brogdon.

Pinamunuan naman ni guard Tim Hardaway Jr. ang New York mula sa kanyang 24 points kasunod ang 19 at 18 markers nina Trey Burke at Mario Hezonja, ayon sa pagkakasunod.

Sa Oakland, humugot si Stephen Curry ng 15 sa kanyang 29 points sa third quarter at binigo ng nagdedepensang Golden State Warriors ang Phoenix Suns, 123-103.

Nag-ambag si Kevin Durant ng 22 points at humakot si Draymond Green ng walo sa kabuuang 35 assists ng two-time defending NBA champions.

Ito ang pang-16 sunod na panalo ng Warriors laban sa Suns at ika-14 dikit nilang home victory laban sa Phoenix.

Sa Los Angeles, nagsalpak si Patty Mills ng isang go-ahead jumper sa natitirang 6.8 segundo para igiya ang San Antonio Spurs sa 143-142 overtime win laban sa Lakers at kay LeBron James.

Tumipa si James ng panablang 3-pointer sa huling 2.4 segundo sa regulation at tumapos na may 32 points, 14 assists at 8 rebounds para sa Los Angeles.

Ngunit naimintis ni James ang dalawa niyang free throws sa nalalabing 12.8 seconds kasunod ang basket ni Mills para sa panalo ng Spurs laban sa Lakers.

Kumolekta si LaMarcus Aldridge ng 37 points at 10 rebounds para sa San Antonio, samantang naglista si DeMar DeRozan ng 32 points at 14 assists.

Binanderahan ni Kyle Kuzma ang Los Angeles, naglaro na wala sina starters Brandon Ingram at Rajon Rondo, mula sa kanyang 37 points at 8 rebounds.