Phoenix magtatangka uli sa bonus
Laro Ngayon(Cuneta Astrodome)
4:30 p.m. Rain or Shinevs Phoenix
7 p.m. San Miguel vs NorthPort
MANILA, Philippines — Susubukan muli ng Phoenix na makalapit sa isang 'twice-to-beat' incentive habang magpapalakas ng kanilang tsansa sa quarterfinals ang tatlo pang koponan.
Lalabanan ng Fuel Masters ang nanganganib na Rain or Shine Elasto Painters ngayong alas-4:30 ng hapon kasunod ang upakan ng San Miguel Beermen at NorthPort Batang Pier sa alas-7 ng gabi sa 2018 PBA Governor's Cup sa Cuneta Astrodome sa Pasay City.
Nadiskaril ang hangarin ng Phoenix na makalapit sa insentibo sa eight-team quarterfinals cast matapos yumukod sa San Miguel, 100-117 noong nakaraang Biyernes sa MOA Arena sa Pasay City.
Sa nasabing laro nangyari ang sinasabing 'pa-nanakal' ni Beermen import Kevin Murphy kay Fuel Masters small forward Calvin Abueva.
Kasalukuyang magkakasosyo sa liderato ang Magnolia, nagdedepensang Barangay Ginebra at Alaska sa kanilang 7-2 record kasunod ang Blackwater (6-3), Phoenix (6-3), San Miguel (4-4), TNT Katropa (4-5), NLEX (4-5), Meralco (4-6), Rain or Shine (2-6), NorthPort (2-7) at Columbian (1-9).
Nakalasap naman ang Elasto Painters ng 84-100 pagkatalo sa Dyip para sa kanilang ikalawang dikit na kamalasan.
Sa ikalawang laro, palalakasin din ng Beermen ang kanilang pag-asa para sa insentibo sa pagharap sa Batang Pier.
- Latest